الـــهـــــــــــــــــــم والـــــــــغـــــــــربــــــــــال

الهم والغربال من صغر سنـي
من وين ماصديـت صـارن قبالـي
الحـظ سـيء والبـلاوي بلنـي
وهمـوم قلبـي مالهـا اول وتالـي
( هربـت ) لكـن الهمـوم لحقنـي
والهـم لازمنـي كـأنـه ظـلالـي
والوقت قاسي والزمـان امتحنـي
عزي لحالي صدق عزي لحالي
كـم مـرة ٍ سـود الليالـي لـونـي
ويامـا لويـت ذراع سـود الليالـي
اليـن شفتـك والخفـوق ارجهنـي
وعقب الهموم اصبح عن الهم سالـي
يامرحبـا يالفاتـن الـلـي فتـنـي
يالفـارع الميـاس يـاراس مـالـي
طوعـت قيفانـي بعـد ماعصـنـي
كله على شان ارسمـك فـي خيالـي
انـا اتغـزل فيـك دايـم لانــي
مالي بدالك وانت مالـك بدالـي
انا دلالك وانـت هيلـي وبنـي
والبن ماله غير صفر الدلالـي
اموت بك واحيـاك واعشقـك وانـي
اعشق شموخك مثل ماعشق شمالـي
اشقر حلو ممشاك ثقل وتأنـي
ادعج غنج مياس ابو ريق حالي
لـولاك ماغنيـت بـدعـي وفـنـي
ولـولاك مالـي بالقصايـد مجالـي
ياللـي طـردت الهـم والغـم عنـي
ادين لك فـي روحـي وفـي حلالـي
واذا تغيـب الهـم يقتـص مـنـي
بالله قبـل تغيـب فـكـر بحـالـي



وسلامتكم


تحيــــــــــاتي

سمو المجد