مالك تصِرِّف زين في مالك!!

لاصار مالك تصِرِّف زين في مالـك
يروح مالك وتبقـا معـك حسْراتـه
المال امانه وربـي عنْـه بيسالـك
في موقفٍ سائله يـدري باجاباتـه
ان كان في خيـر تهنابـه ويهنالـك
تزرع وتحّصُد بعَـد بكـره ثَمَراتـه
وان كان في غير ربي يصِّلِح احوالك
من قبـل لاتنكتـب عليـك سيّاتـه
يالله ياللي جميـع النـاس تلجالـك
ياواحـدٍ كلبونـا تحـت رحْمـاتـه
يامالك المُلك والعـزَّه لـك لحالـك
ياباسط ارضـه ويارافـع سماواتـه
ياقـادرٍ ماتجـوز الدعـوه الا لـك
ياعالـمٍ ذاتنـا مانعـلـم بـذاتـه
ترحم ضعيفٍ توالي الليل نـادا لـك
تسابقت قبـل رفْـع يديـه عبراتـه
مذنب ونادم ولـولا رحْمتـك هالـك
ماغيرك احدٍ يفكـه مـن معاناتـه
خلاّ جميع الخلايـق خلّفـه وجالـك
ما احدٍ من الناس يدري ويش حاجاته
تقطّعَت به حبـال الوَصـل والفالـك
مافيه غيـرك يلبـي لـه طلباتـه
ضاقت عليه الدروب ووقّـف قبالـك
يرجيك يارب تقبـل منـه دعواتـه
ياللي قضيت العُمر كله على حالـك
ابطيت والوقت ضاعت منْك ساعاتـه
الى متى وانت تمشي فـي تمِهّالـك
وتقول بكره وبكـره تكْثـر امواتـه
الله يُمهِـل ولكـن طـوّل اهمالـك
والموت لامن بغا له حـي مافاتـه
تلقـاه خلْفـك وقدامـك ويبـرالـك
في كل يومٍ تجي في الناس وقْعاتـه
خلّك على باله وخلّـه علـى بالـك
لابد يـومٍ يجـي وتـذوق سكراتـه
وتروح للقبر فـي بيتـك ومنزالـك
وكلٍ على وجْهِته تضْهُـر علاماتـه
ماعاد يبقالـك الا صالـح اعمالـك
والا من المال تبقـا لـك صدقاتـه
لاتحْسِب انه بيدفـن جنبـك ريالـك
غيرك تولاّه واصبح فـي حساباتـه
وان كان مالك تصِرِّف زين في مالك
يروح مالك وتبقـا معْـك حسراتـه
المال امانه وربـي عنْـه بيسالـك
في موقفٍ سائله يـدري باجاباتـه



تقبلو تحيأأأأأأأأأأأأأأأأأتي

سمو المجد