احدٍ يبيها تجـي مـن غيـر مايـدري
واحدٍ درا غير راحت عنه مـا جاتـه
ماهيب من صيد من يمشي وهو عبْري
ولاهيب ترتـاح للـي طـوّل سكاتـه
سر ياقلم وادْ مجهودك مـن الحبـري
اللـي لامنّـه كتـب بانـت كتاباتـه
خل الحبر فوق مصقول الورق يجـري
من شافه يقـول يامجْمـل عباراتـه
انا عرفت الكلام الزيـن مـن بـدري
لكن مانيـب آقولـه غيـر باوقاتـه
مانيـب فـي كـل ديوانيـه آهـذري
وماجيبه الا ليامـن قيـل لـي هاتـه
وان كان وجه القصيد مشوهه جـدري
دكاتـر الشعـر يلْزمهـم مـداواتـه
ماهوب لامن نشدّتـه قَـدّم العُـذري
حتى طبيـب الادب ضاعـت اماناتـه
يانعنـبـو واحــدٍ ذراه مـايــذري
لاكان بيـن العـرب تكْثـر علاقاتـه
لاصار ماغيـر فالمعطـان وايهَـدْري
واصغر قعودٍ على الما يقْطـع لهاتـه
فان النبط مايبـي دكْتـورِه الفخـري
وماهـوب يحتـاج للدكتـور وابياتـه
والفلسفه فالشعر مفهومهـا عصـري
والا الشعر مـن قديـمٍ فاختراعاتـه
مافيه شيٍ يسمّى فالشعـر حصـري
كـلٍ يقـدّيـه رايــه واجتهـاداتـه
احيان يطري علي واحيـان مايطـري
اللي يشـوف العـرب بعيـون نّياتـه
مع كل موضوع تلقا مخّـه ايحَـدْري
ويجيب سيّاتـه اللـي قبـل حسْناتـه
يعني لو اني بغيـت آقـول ياعمـري
يطلـع علـي سـئ النيـه بطلعاتـه
ويقول في داخله وسواسـه القهـري
وش قوم ابن مقبـلٍ يضْهِـر خفيّاتـه
مانيـب فاجابـة المتحـدّث بمـزري
لكن راعـي النوايـا كيـف اجاباتـه
احدٍ يجي مع نفق واحدٍ علـى كبـري
كـلٍ علـى نيّتـه تبـيـن غايـاتـه
والحب سمّوه مـن سمّـوه بالعـذري
مـن كثـر زلاّتـه وكثـر اعتذاراتـه
مفهوم تـوّه جديـد ومنتجـه فكـري
وآحـب منتـوج فكـري وابتكاراتـه
يابُصر عقلي على تفكيـره وبُصـري
كلٍ مـع التجربـه تضهـر قناعاتـه
لاكان مايعْجـب المكتـوب والمقـري
راعـي البهـارات معْجبْتـه بهاراتـه
محدٍ بياخـذ علـى وزره بعـد وزري
من ضاقت ارضه فلا ينسى سماواتـه
كم واحدٍ فلْسفاته قـد مشـت جبـري
وكتابـه يخلّـص وتنعـاد طبعـاتـه
مجاملات العـرب والمبلـغ المغْـري
تصنـع جماهيـر وتسـوّق خرافاتـه
اما يجي حلّها عنـد العـرب جـذري
والا يكـب المشـرّه كثـر شرهاتـه
والظاهر انها بعد جتني وانـا مـدري
وكم واحدٍ ودّه ابها غيـر مـا جاتـه
مماراق لي
تحيأأأأأأأأأأتي
يالغالين
سمو المجد
hp]S dfdih j[Jd lJk ydJv lhdJ]vd